Onsdag dansa breakdancegruppa Freestyle Phanatix for elevar ved Flora ungdomsskule
Kultur er ikkje berre biletutstillingar og ballett. Det er eit omgrep mykje breiare enn det. Og det kan også vere svært så fengjande for ungdommen.
– Hiphop er litt annleis enn mykje av finkulturen ein tenkjer på når ein høyrer ordet «kultur». For hiphop er ein kultur, om enn mykje yngre enn mykje anna vi tenkjer på som kultur.
Det understrekar Kim Kirkemo Bøytler i den danske breakdancegruppa Freestyle Phanatix som er Skandinavias største breakdancetropp, med over 2000 framsyningar og workshops i både Skandinavia og Europa.
Berre fem minutt tidlegare hadde han og resten av gruppa fått stor applaus frå ungdomsskuleelevane i Florahallen.
– Vi vart tekne veldig godt imot av ungdommen her i Florø. Dei let seg rive med, fordi kulturomgrepet er noko annleis for dei, smiler Kirkemo Bøytler.
