Tidlegare Måløy Vekst-leiar Kristin Maurstad blir prosjektleiar for subseaingeniør-utdanninga i Florø. Ho tek også over jobben som prosjektleiar får Kystvegen.
Onsdag er det offisiell lansering av forprosjektet til subseaingeniørutdanninga i Florø. I dag kom også nyhenda om kven som skal drive fram prosjektet, som vonleg vil gi 90 høgskuleplassar i Florø om få år.
Den 5. mars startar Kristin Maurstad som prosjektleiar, og ho får jobben med å planlegge og organisere forprosjektet, og trigge regionalt næringsliv til å bli med på å finansiere den viktige satsinga som kan gje sårt tiltrengt offshorekompetanse i fylket.
Med utgangspunkt i jobben som dagleg leiar for Måløy vekst, jobba Maurstad inntil nyleg med å samordne næringsutviklingskrefter i Nordfjord, der målet var oppretting av Nordfjord Vekst. Men då politikarane i Vågsøy valde å støtte indre trasé-forslag når det gjaldt framtidas E39, blei det bråk og krigstypar frå Eid. Maurstad, som også er varaordførar i Vågsøy, hamna i ei dobbeltrolle som gjorde arbeidet hennar vanskeleg, og ho valde å slutte i Måløy Vekst.
No ventar den viktige oppgåva som mellom anna vil bety å stable minst ti millionar kroner på beina. Det er prislappen på tre års drift av studiet i Florø, og det må fullfinansierast for at høgskuledraumen skal kunne realiserast.
Men Maurstad får også ei anna nøkkelrolle. Når Eivind Hjellum no går av for alderen, tek Maurstad over jobben som sekretariatsleiar for Kystvegen Bergen - Ålesund.
