FLORØ: Torsdag kjem OL- og VM-vinnar Terje Langli på florøbesøk for å lære bort smørjetriks.
Det er MX Sport på Evja som har henta den tidlegare smørjesjefen for det norske skilandslaget til kystbyen.
– Det var formidabel oppslutnad då Terje var innom oss i fjor, og no gjentek vi suksessen, seier Tore Strømmen ved MX Sport.
Økta på torsdagskvelden er delt i to, der første time går på grunnleggjande prinsipp og er mynta på dei litt ferske. På andre økta vil Langli tilby ny kunnskap til dei litt vidarekomne innan smørjefaget.
– I fjor møtte over 60 interesserte opp, og det er fint om folk melder frå på førehand til oss om dei vil vere med, slik at vi kan tilbpasse opplegget ut frå deltakarantalet, seier Strømmen.
Han meiner kunsten å smørje ski er ekstra utfordrande for vestlendingane, som kan oppleve store svingingar i ver og føreforhold på kort tid.
– Vi ser fram til denne økta i kveld. Langli er ein meister i faget, og i tillegg til lokalt interesserte har det meldt seg på folk frå så langt borte som Gaular, seier Strømmen.
Skisalet i Florø har vore bra i vinter, veret og tilhøva teke i betraktning.
- Vi har selt godt med ski trass i mildveret. Det viser at florøfolk er vande med å flytte litt på seg for å utøve skisporten. Og ein skal jo ikkje lenger innover enn til Storebru/Eikefjordområdet før ein finn gode forhold, seier MX Sport-leiaren.
Smørjekvelden er open for alle interesserte, uavhengig av kompetansenivå.
